دليل البريد المصري
كتير مننا فاكر إن البريد لمجرد دفع الرسوم الحكومية ومصاريف المدارس أو إرسال طرود وشحن منتجات بس على العكس تماماً، هيئة البريد منظومة متكاملة وبتشمل خدمات مالية قريبة جداً من البنوك.
حسابات البريد المصري
البريد بيوفر حسابات كتيرة شبيهة إلى حد كبير بالبنوك, وكل شروطهم واحدة: بطاقتك الشخصية ومبلغ رمزي لفتح الحساب.
حساب سوبر توفير
هو حساب توفير بيوفر عائد سنوي 14%، وبيتم احتساب العائد لما رصيد الحساب يوصل لـ 50 ألف جنيه مصري.
حساب توفير عادي
دا الأشهر بينهم وبيوفر عائد سنوي 7%، وبيبدأ احتساب العائد من أول مبلغ 1,000 جنيه مصري في الحساب.
بطاقات (كروت) البريد المصري
- كلاسيك البريد المصري: كارت Debit مرتبط بحسابك في البريد ومتاح لأي حد. (مش بيتربط في PayPal في الوقت الحالي).
- جولد البريد المصري: كارت شبه الكلاسيك، بس عشان تقدر تطلبه لازم يكون في حسابك رصيد 20 ألف جنيه فما فوق. مميزاته حالياً مش بتختلف عن الكلاسيك (زمان كان بيدي ليميت دولاري ضعف الكلاسيك). (مش بيتربط في PayPal في الوقت الحالي).
- إيزي باي (EasyPay): الكارت الأشهر في البريد؛ لأنه كارت الـ Prepaid الوحيد في مصر اللي متاح تربطه بـ PayPal, مشكلته إن التطبيق بتاعه ضعيف جدا ومليان مشاكل.
- كروت ميزة: كروت Prepaid مخصصة للمعاشات ومناسبة للدفع الحكومي، ومش بتحتاج تفتح حساب في البريد عشان تطلعها.
- يلا باي (Yalla Pay): كارت شبه إيزي باي إلى حد كبير، بس الأبلكيشن بتاعه ممتاز ومنظم جداً, عيبه الوحيد إنه مش بيتربط بـ PayPal.
مميزات وعيوب البريد المصري
المميزات
- الانتشار: البريد من أكتر المنشآت انتشاراً في مصر (حوالي 4,720 مكتب). هتلاقيه في كل حتة جنبك تقدر تسحب وتودع وتبعت من خلاله.
- متطلبات فتح الحساب: عشان هو مؤسسة حكومية مش تابعة للبنك المركزي، متطلباته سهلة جداً ومش بيطلب إثبات دخل, محتاج بس بطاقتك ومبلغ رمزي (حوالي 500 لـ 1,000 جنيه) بيفضلوا في الحساب, رسوم فتح الحساب والكارت مع بعض 200 جنيه بس, وأقل سن لفتح الحساب هو 16 سنة (وأنت المسؤول عن الحساب مش هتحتاج واصي).
- انتشار المكن (ATMs): المكن بتاعه منتشر جداً والسيستم حديث، نادر جداً لما يحصلك مشاكل زي عمليات السحب الوهمي.
- السحب من البنوك التانية: تقدر تسحب من أي مكنة تابعة لأي بنك في مصر، بس ابعد عن (HSBC و AlexBank) عشان بيحصل معاهم مشاكل و الأفضل دايماً تسحب من مكن البريد، أو البنوك الحكومية (الأهلي، بنك مصر، القاهرة)
- التحويل من وإلى البنوك: عشان هو بيتعامل كحساب بنكي، تقدر تبعت وتستقبل من أي بنك تاني:
- الإرسال: تقدر تبعت لأي حساب بنكي في مصر من خلال مكاتب البريد بس (نظراً لأن التطبيق لسه تحت التطوير).
- الاستقبال: البريد بيديك رقم حساب ورقم IBAN، تقدر تديهم لأي حد يحولك عليهم، بشرط إنه يحول من بنك متعاون مع البريد زي بنك مصر.
- نظام الكاش باك (وينز - Wins): البريد حالياً بيوفر نظام مكافآت بيديك كاش باك على أي معاملة بتعملها باستخدام أي كارت من كروت البريد.
- كشف الحساب: معترف بيه في السفارات والمواقع الدولية. بس العيب إنه بيتجاب من مكان واحد بس: (الإدارة المركزية لحسابات التوفير في بريد الألفي بالعتبة).
- كشف عربي: بـ 100 جنيه (محتاج بطاقتك بس).
- كشف إنجليزي: بـ 200 جنيه (لازم باسبور ساري وبطاقة).
العيوب
- مفيش إنستاباي (InstaPay): من أكبر عيوب البريد حالياً إن كروته وحساباته مش بتتربط بإنستاباي؛ لأن البريد هيئة مالية مستقلة مش خاضعة للبنك المركزي.
- التطبيق (App): مفيش إمكانية لإدارة حسابك أونلاين بسهولة زي البنوك التانية، بس حالياً بيتم تطوير تطبيق مخصص للبريد.
- الزحمة: عشان البريد بيقدم خدمات حكومية كتير، أغلب المكاتب بتبقى زحمة جداً، خصوصاً في أوقات صرف المعاشات.
- التحويل الدولي: البريد بيديك رقم IBAN، بس هو للاستخدام المحلي فقط لأنه مش بيوفر رقم Swift فعال (موجود سويفت برقم
PSTEEGC1بس مُعطل حالياً).