علامات تحذيرية للتسويق الشبكي الهرمي (نظام النصب الحديث)
1: لازم تدفع فلوس (عشان تبدأ)
الشغل الحقيقي بيدفعلك مقابل مجهودك
لو انت اللي بتدفع عشان تشتغل يبقى انت العميل مش الموظف
حتى لو قالوا دي باقة منتجات
اسال نفسك
لو ما دخلتش النظام هل كنت هتشتريها فعلا بالسعر ده؟
2: شراء شهري إجباري (تنشيط)
بيخلوك كل شهر تدفع مبلغ عشان تفضل نشط
ده معناه ان ارباحك المفروض تغطي مصاريفك وتكسب
لو شهرين ما بعتش كويس انت بتخسر صافي
دي طريقه تضمن ان الشركه كسبانه منك سواء نجحت او لا
3: عمولات التجنيد اكبر من عمولات البيع
مهم تشوف جدول الارباح!
هتلاقي انك تاخد عموله كبيره لما حد يدخل تحتك
لكن عموله صغيره جدا لو بعت المنتج لعميل عادي
ده معناه ان التوسع اهم من البيع وده تعريف (النظام الهرمي)
4: المنتج ملوش وجود حقيقي في السوق
جرب تبحث
هل المنتج موجود في امازون او محلات عاديه؟
هل حد بيشتريه بدون ما يدخل الشبكه؟
لو الاجابه لا يبقى المنتج وسيله مش غايه
5: سعر مبالغ فيه
منتج قيمته ٣٠٠ جنيه يتباع بـ ١٥٠٠
ليه
عشان ١٢٠٠ جنيه رايحين عمولات للمستويات
المنتج بيتحمل تكلفه النظام مش العكس
6: مفيش احصائيات حقيقيه
الشركات القانونيه بتنشر
- متوسط دخل الموزعين
- نسبه اللي بيكسبوا
- نسبه اللي بيخسروا
التسويق الشبكي غالبا يوريك قصص نجاح فرديه بس
7: استعجال وخلق خوف
- المكان هيخلص
- المرحله دي مش هتتكرر
بيخلقوا احساس انك لو ما دخلتش فورا هتضيع حياتك
الفرصه الحقيقيه مش بتهرب منك خلال ٢٤ ساعه
8: استعراض مبالغ فيه
سفر عربيات ساعات
لكن اسال هل دي ارباح فعليه ولا مكافآت مشروطه بارقام تجنيد؟
في شركات كتير بتدي عربيات ايجار باسم الشركه مش ملك الشخص
9: تدريب نفسي اكتر من تجاري
هتلاقي اغلب الاجتماعات
- تحفيز
- قصص نجاح
- طاقه ايجابيه
لكن قليل جدا شرح - تحليل سوق
- استراتيجيات بيع حقيقيه
- دراسه منافسين
ده لان الهدف مش البيع الهدف الحماس
10: لوم الضحيه
لو خسرت يقولوا
- انت ما اشتغلتش كفايه
- ما حضرتش كل الاجتماعات
- طاقتك مش ايجابيه
ما يعترفوش ابدا ان النظام نفسه محدود
11: الهجوم على اي نقد
لو جبت فيديو ينتقد الشركه يقولوا لك
ده فاشل
او حاقد
او مش فاهم
الشركه القويه (لو شركه) ترد بالارقام مش بالعواطف
12: استرجاع فلوس صعب
جرب تسال قبل ما تدخل لو قررت اخرج بعد اسبوع استرد فلوسي؟
هتلاقي شروط معقده جدا
13: استنزاف العلاقات
اول قائمه بيطلبوها منك
- اهلك
- صحابك
- زمايلك
بعد ما تخلص دايرتك القريبه تبدا المشكله
14: تشبع السوق
النظام قائم على نمو هندسي فشيخ
لو كل شخص محتاج ٥ اشخاص
بعد ١٢ مستوى تحتاج ملايين
{5}^{ 12 }
الواقع مش بيستحمل ده
15: الربح في القمه (فقط)
اللي دخلوا الاول عندهم افضليه زمنيه
كل ما تدخل متاخر فرصتك تقل
16: عزل فكري (غنم في قطيع)
ما تسمعش لحد برا
اللي برا مش فاهمين الرؤيه
ده اسلوب نفسي يخليك تعتمد على المجموعه وبس
17: مصطلحات ضخمه بدون تفاصيل
حريه ماليه
استقلال
دخل سلبي
اسال كام رقم محدد كام مده كام مخاطره؟
لو الاجابه دايما عامه انت بيتسوقلق حلم
18: تسجيل قانوني (ضعيف او مافيش)
كتير منهم مسجلين في دول قوانينها مرنه لو مسجلين اصلا
ولو مسجلين فعلا: اوراق مزوره او اسامي مستعاره او كله من تحت لتحت مع حد ثقيل(لو الموضوع كبير)
لو حصل مشكله مفيش رقابه قويه تحميك
19: دخل غير ثابت
مفيش راتب
مفيش ضمان
مفيش عقد يضمن حد ادنى
ده معناه ان المخاطره عليك وحدك
20: الحسابات الرياضيه تفضح لوحدها
لو كل شخص محتاج ٣ اشخاص بس
٣ ← ٩ ← ٢٧ ← ٨١ ← ٢٤٣ ← ٧٢٩ ← ٢١٨٧ ← ٦٥٦١ ← ١٩٦٨٣ ← ٥٩٠٤٩
بعد ١٠ مستويات بس محتاجين مدينه كامله
{3}^{ 10 }
السوق مش غير محدود
21: تغيير الخطة باستمرار
تلاقي الشركة كل شويه
- تغير نظام العمولات
- تزود شروط
- تقلل نسب
- تعمل “إعادة هيكلة”
ليه؟ لان النمو الطبيعي بيبدأ يبطأ فبيعدلوا القواعد عشان يحافظوا على الاستمرار
الشغل الحقيقي ما بيغيرش الاسس كل شهرين ثلاثه
اهم حاجه تعرفها
اغلب الضحايا ناس
- عندهم طموح
- عايزين يغيروا حياتهم
- بيدوروا على طريق سريع
الطريق السريع غالبا بيبقى مختصر غلط
لو انت دخلت فعلا
ما تتكسفش تعترف لنفسك بدري
الخروج بدري مكسب مش خساره
القانون لا يحمي المغفلين
دي اصبحت قاعده في العالم
نصيحه: (بلاش تكون مغيب التفكير)