ليه ممكن أشغل بالي بإدارة فلوسي؟
قصة إيلون وجيف
إيلون وجيف جيران واشتغلوا نفس الشغلانة، كل واحد مرتبه 10,000 جنيه. مصاريفهم في الأكل والمواصلات زي بعض، كل واحد بيصرف 5,000 جنيه وبيتبقى معاه 5,000 جنيه. الفرق الوحيد بينهم إزاي كل واحد بيفكر في الخمسة تانية.
إيلون عنده هدف: بعد سنة يجيب لاب توب كويس ويكون معاه مبلغ يدفع بيه مقدم شقة.
جيف بيحب يشبرق على نفسه، وأي حاجة بتتبقى من المرتب بيفرتكها في نفس الشهر. العمر مرة واحدة مش كده؟
الفرق في القرارات
1. الادخار والاستثمار
إيلون قرر يستثمر الـ 5,000 كل شهر في صندوق استثمار بعائد ثابت 22% عن طريق ثاندر.
جيف الشهر الأول جاب إيربودز، الشهر التاني جاكت جلد، التالت فيب (وهو مش بيدخن)، الرابع عزومة في حضرموت.
2. استخدام البطاقة
إيلون بيسحب على قد احتياجه بس، وبيستخدم Contactless Payment وانستاباي وتطبيق البنك.
جيف بيسحب المرتب كله أول ما ييجي ويسيب البطاقة فاضية للشهر الجاي.
3. الفكة والمصاريف الصغيرة
إيلون بيدفع بالكارت Contactless وبيريح دماغه.
جيف محفظته مبهوقة دايماً بس مش لاقي فكة في السوبرماركت.
4. باقة الموبايل
إيلون عارف استهلاكه، بيعمل باقة شهرية بـ 150 جنيه من فودافون كاش من البيت.
جيف بيعدي على كشك كل يومين يجيب كارت فكة بـ 20 جنيه، يعني 300 جنيه في الشهر على نفس الخدمة.
5. الدفع الإلكتروني
إيلون معاه كارت فوري الأصفر، دفع ثمن الكورس من تطبيق My Fawry من البيت.
جيف نزل يدور على كشك فوري في الشارع يدفع نفس الكورس.
6. بعد 6 شهور: القيمة الزمنية للنقود
إيلون سمع عن القيمة الزمنية للنقود وإن الفلوس الورقية قيمتها بتقل مع الوقت. فتح حساب ثاندر لقى فيه 31,150 جنيه (كسب 1,350 جنيه على الأصل)، سحبهم واشترى بيهم ذهب بسعر 4,500 جنيه للجرام.
جيف الشهر ده معرفش يشتري إيه، راح جاب بغبغان. 🦜
7. توزيع المخاطر
إيلون فضل يستثمر الـ 5,000 في صندوق ثاندر عشان سمع عن توزيع المخاطر وإن الأحسن ميحطش كل فلوسه في حاجة واحدة.
جيف حس إنه لازم يشغل فلوسه، صاحبه قاله هيستثمرها في مشروع تزغيط بط وبطارية كتاكيت، فجيف بدأ يديله الـ 5,000 كل شهر لمدة 6 شهور.
8. بعد السنة: الحصاد
سعر الذهب وصل 6,600 جنيه للجرام. إيلون باع الذهب بـ 45,686 جنيه، كسب 14,536 جنيه.
جيف راح يسأل صاحبه على فلوسه، صاحبه قاله إنفلونزا الطيور قتلت نص البط والكتاكيت، وعشان هو صاحبه أداله 15,000 جنيه تعويض. خسر 15,000 جنيه.
9. الحساب الختامي
| إيلون | جيف | |
|---|---|---|
| استثمار ثاندر | 31,150 جنيه | — |
| بيع الذهب | 45,686 جنيه | — |
| الإجمالي | 76,836 جنيه | 15,000 جنيه |
| ممتلكات أخرى | لاب توب جيمينج | بغبغان 🦜 + جاكت جلد (والإيربودز ضاعت) |
الكريدت كارد: آخر درس
إيلون فتح تطبيق البنك وطلب كريدت كارد بضمان المرتب، استلمها في أسبوعين. لقى عرض تقسيط على أمازون بدون فوائد ولا مقدم، اشترى لاب توب جيمينج بـ 30,000 جنيه وبدأ يتخصم منه 5,000 جنيه شهرياً لمدة 6 شهور.
جيف برضه راح البنك بس في وقت الزحمة، فضل مستني ساعتين. استلم الكارت بعد أسبوعين، بس اتزنق في فلوس واستلف منها ونسي يسدد لمدة شهرين. لما افتكر ورجع يسدد لقى المبلغ أكبر بكتير، كلم خدمة العملاء، الموظف قاله: "مفيش غلط، دي غرامة التأخير في السداد."