ايه هو مصلطح "الحرية المالية"؟

• تعريف الحرية المالية بالمعني الحرفي هو إنك يكون معاك فلوس كافية سواء مستثمرها أو شايلها في البنك أو عنده مصدر دخل مضمون مثل المعاشات العالية أو الورث بحيث ان الفلوس دي شغالة ليك مش العكس، أنت بتكون مش مرتبط بوظيفة او مصدر دخل ثابت أغلبية الوقت، بتقدر تعمل قرارات حياتك بدون الضغط المادي البيكون موجود بشكل دائم في حياة أغلبية الناس، وصولك للحرية المالية المفروض يكون هدف أي شخص بيحاول يرتاح نفسيا من الضغط المستمر وعايز يشغل فلوسه مش هو اليشتغل عشان الفلوس.

• من شروط ان شخص يعتبر "حر ماليا" هو ان مصادر دخله الحالية بتغطي جميع مصاريف طريقة حياته بشكل مستمر بدون ما الشخص يضطر انه يشتغل بنفسه في وظيفة او يكون عليه ديون مستمرة.

• ولكن عشان متتلغبطش، انك تكون "حر ماليا" مش معناه انك مش هتشتغل نهائي، الحرية المالية هدفها انك تكون حر في قرارات حياتك وهواياتك بدون القلق الدائم من "طب هجيب منين؟"، يعني انت ممكن تكون بتحط شوية وقت في انك تخلي بالك من فلوسك برده أو ممكن انت فاتح شركة ومش حابب تسيبها، مش معناه انك شغال يبقا انك مش "حر ماليا" ولكن انك تكون حر ماليا معناه انك مش ضروري تشتغل لو مش حابب.

ولكن هل التعريف ده موحد للجميع؟

• التعريف المكتوب فوق ده ممكن يختلف جدا من شخص لشخص، دي تعتبر النظرة العامة علي الموضوع وأنت ممكن يكون فكرتك عن الحرية المالية مختلفة تماما، وحاجة من أكتر الأشياء المؤثرة في التفكير المالي هي طفولة كل شخص وازاي اتعلم انه يتعامل مع الفلوس من سن صغير، طبعا العادات بتتغير ولكن ده مؤثر كبير، في ناس بتحاول توصل للحرية المالية في سن صغير بأسرع ما يمكن عن طريق انهم يتبعوا خطط عديدة زي أكتر شئ تقليدي هو انك تقلل المصاريف علي أقل ما تقدر وتزود الاستثمارات الخاصة بيك علي المدي البعيد، وفي ناس بتفضل انها توصل للحرية المالية عن طريق انهم يحوشوا علي مدار السنين لحد ما يطلعوا معاش في سن كبير، كل شخص عنده فكرة مختلفة عن الأخر.

ايه البيأثر علي قدرة الشخص انه يكون حر ماليا؟

• في عوامل كتير بتدخل في إمكانية الواحد علي انه يكون حر ماليا، من ضمنها عوامل كتير بتيجي في سن صغير أو من تصرفات الأهل قدام الشخص وهو ميعرفش غير كده، الأهل بيأثروا بشكل كبير في علاقة كل شخص والفلوس بتاعته سواء هم عارفين كده أو لا، خليني اديلك مثال:
  • عندك أحمد: والده كان شخص يعتبر حاله علي القد بس مش مديون لحد والدخل الموجود ممشي الدنيا، كان بيديله مصروف يدوبك علي قد اليوم، مواصلات ويدوبك يفطر وبس، أحمد مكنش متضايق من كده لأنه مكنش يعرف غير كده، وأبوه كان دايما بيقوله يشيل القرش الزيادة وقت الضرورة ("الجنيه الأبيض ينفع في اليوم الأسود")، أحمد ده لما كبر ومسك وظيفة بدخل ثابت يومه كان برده ماشي علي قد الضرورة فقط، مكنش بيخاطر جدا بالفلوس وكان بيحاول يبني ثروة بطيقة بحيث انه يطلع معاش بمبلغ كويس.
  • عندك مصطفي: والد مصطفي كان صاحب شركة وفاهم كتير في التخطيط المالي، ولكن كان بينشغل كتير في شغله لدرجة انه مكنش بيكون موجود في حياة مصطفي كتير فمكنش بيعرف يعمل ابنه أي خبرات حياتية، وكان بيحاول انه يعوض عن كده بإنه يديله كل يوم مصروف بزيادة وكل ما يطلب حاجة كان بيجيبهاله، ومصطفي كان بيستغرب لما حد من صحابه يقوله معييش فلوس اشتري ده، كان دايما عنده وجهة نظر ان الفلوس سهلة ودايما متاحة مهما كانت الظروف، ولكن كمان مكنش واعي بفكرة ان في حاجة اسمها "ظروف"، ده خلاه ميعتمدش علي نفسه ويبدأ شغل أو يبني مستقبل لنفسه غير في سن أكبر من المعتاد والهو أثر عليه بشكل نفسي وأدي الي ضغط مالي كبير، بقا عيش الشهر يدوبك علي قد الشهر وحاسس انه مخنوق طول الوقت ومش عارف يعمل ايه.
  • عندك كريم: والد كريم شخص من الطبقة الفوق متوسطة، كان موظف وبيشتغل ساعات زايدة كل يوم يعتبر لحد ما عرف أنه يبدأ يستثمر فلوسه ويقلل المصاريف ويحاول يلاقي مصادر دخل زيادة بدون ضغط أكتر وبالتالي عرف انه يقلل ساعات شغله، كان بيدي لكريم مصروف شهري ويفهمه ازاي يخلي الفلوس تمشي معاه الشهر ويمكن تزيد، فهم ابنه ازاي ميضيعش فلوسه في الحاجات الغلط وازاي يكون فعلا شخص بيفهم فلوسه رايحه فين وجاية منين، كريم ده لما كبر شوية اشتغل أونلاين وهو في الجامعة من سن صغير وفهم ازاي الفلوس شغالة وبدأ يكون ثروته في سن كويس وكان مسؤول جدا في فلوسه.

• طبعا في عوامل تانية زي الحالة النفسية، الديون، العلاقة بالأهل (زي البيصرف علي أهله)، مصاريف صحية غير متوقعة، وغيره كتير.

ايه هي بقا مصادر الدخل التجيب الحرية المالية؟

• دي قايمة من أشهر الطرق البتجيب منها دخل بدون عمل عشان تحقق بيها الحرية المالية:
  • شهادات أو ودائع البنوك - ودي اتشهرت في مصر الفترة الأخيرة بالخصوص بعد فترة الأزمة الاقتصادية اللسه معديين منها كلنا
  • رئاسة شركة / مكان عمل - بشرط ان المكان او الشركة مش بيحتاج وجودك الدائم فيه، فكر مثلا واحد فاتح مطعم ومعين ناس فيه وهو بيجي مرة في الشهر يشوف الدنيا بس
  • استثمارات علي المدي البعيد - زي مثلا البورصة والدهب
  • ايجار العقارات - ناس كتير في مصر عندها شقق مأجرينها وهي واحدة من أشهر الطرق الممكن تعمل بيها دخل مستقر ويمكن توقعه
  • المعاشات - أيوه المعاشات تعتبر مصدر دخل كويس جدا بالأخص لو معاش قوات مسلحة أو شرطة زي ما كله يعرف غالبا

ملخص الموضوع؟

• عشان توصل للحرية المالية انت محتاج إن يكون عندك مصادر دخل أكتر من أو تساوي احتياجك الشهري من الفلوس بدون الحاجة بإنك تشتغل بنفسك عشان تجيب الدخل ده، مثلا لو شخص 25 سنة محتاج 10 ألاف جنيه في الشهر وعنده شقتين مأجرهم كل شقة ب5 ألاف ده معناه انه كده حر ماليا، ولكن لو شخص 50 سنة ودخله بدون شغل حوالي 50 ألف ومصاريفه 60 ألف يعتبر مش حر ماليا لأنه هيضطر يشتغل عشان يجيب الفرق، الفكرة مش في كمية الفلوس، الفكرة في انك مش هتضغطر تشتغل عشان تقضي احتياجاتك، ولكن طبعا متنساش نسبة التضخم، لازم دخلك يزيد بنفس أو اكتر من نسبة التضخم كل سنة عشان متزدش مصاريفك عن دخلك ومتبقاش حر ماليا بعد كده.